• 1. Kazi ni faradhi katika maisha

• 2. Dharau ya kazi

• 3. Majivuno ya heshima ya uwongo

• 4. Watu bora hawatahayari kwa kazi

• 5. Watu walioelimika na ubora wa kazi

• 6. Huhakikisha maendeleo ya watu na mataifa

Dini zote zimehubiri mapenzi ya kazi. Agano la Kale husema, “Utakula chakula chako kwa jasho la uso wako.” Katika Islamu uvivu ni dhambi. Chakula kipatikanacho bila kazi sawa na chakula kipatikanacho kwa wizi.

Kwa maendeleo ya ustaarabu tumeanza kudharau ubora wa kazi. Ustaarabu wetu wa sasa umetupa nafasi kubwa, lakini umetufundisha kuchukia kazi. Mke mvivu huchukia jiko akamwachia mpishi kazi nzuri ya kupika. Mama mzembe huona mtoto wake kama mashaka akamwacha katika ulinzi wa yaya. Mwanafunzi goigoi hujilegeza kama mboga hata hutaka mtumishi wa kumchukulia vitabu vyake skuli. Hivi ndivyo ilivyo hali yetu juu ya kazi.

Wale waliopata utajiri au heshima hujivuna. Wafikiri kwamba namna yoyote ya kazi ya mikono si kadiri yao. Wengine katika hawa hufanyiwa kazi zao na watumishi. Huajiri watumishi wengi kwa sababu ya kuonyesha utajiri tu. Nimeona mabibi wanakwenda kutembea, wakitaka watumishi wa kuwachukulia mifuko na miavuli yao. Topasi ana heshima kubwa mno kuliko mtu mvivu ajikaliaye kitini bure. Mkulima astahili sifa kubwa mno kuliko tajiri mzembe. Nani atasema sasa kwamba hapana ubora katika kazi? Hapana aibu ya kujipatia pesa ya halali kwa kufanya kazi.

Utaratibu wetu wa elimu umehusika na chuki yetu ya kazi. Twajifunza kufanya kazi ya akili tukasahau kutumia viungo vyetu. Twatamani kazi ya akili tukajaribu kuepuka kazi ya mikono. Kazi ya akili tutakayo ina mashindano yasumbuayo sana afya yetu. Mwana wa mhunzi akielimika hustahabu kuwa karani wa kuajiriwa, kuliko kumiliki kiwanda cha uhunzi. Mwana wa mkulima akielimika hutaka sana kuwa karani katika shamba la katani, kuliko kuanzisha shamba lake mwenyewe. Mwana wa mfanyabiashara akielimika hupenda sana kuwa karani wa hazina, kuliko kuendesha duka lake mwenyewe. Heshima hii ya uongo huleta shida ya kazi kwa watu walioelimika.

Kazi ya kutumia mwili ni kitu bora. Hutuliza chakula tumboni ikaleta usingizi mzuri. Hutia nguvu mwilini ikaendesha akili. Huimarisha afya. Kazi ni msingi wa furaha yote. Mtu hawezi kuendelea pasipo kazi.