• 1. Tamaa na ndoto zangu

• 2. Kwa matumizi ya watu

• 3. Faraja zangu mwenyewe

• 4. Msaada kwa jamaa

• 5. Msaada kwa ajili ya elimu

• 6. Kuondoa mashaka ya maskini

Nakumbuka methali, ‘Tamaa mbele, mauti nyuma.’ Methali hii huvunja moyo wa mtu adumishaye ndoto za wakati ujao. Lakini sivunjiki moyo kwa sababu tamaa ni gurudumu la usitawi. Kwa nini mtu akate tamaa ya kuwa tajiri? Naota daima ndoto ya kuwa tajiri mkubwa. Sikomi hapo. Nina azimio jema la kutumia utajiri wangu taraa nikiupata.

Mimi si mmoja katika wale watakao mali kwa sababu ya kuweka mpaka imeliwa na kutu. Mali ni kitu cha matumizi ya watu tu. Napenda utajiri, kwa sababu utageuza ndoto zangu nyingine kuwa kweli.

Nitanunua kiwanja kizuri cha ardhi. Nina maono yangu mwenyewe juu ya ujenzi wa nyumba yangu. Haitakuwa na zaidi ya sakafu mbili, Hawa yangu ya maua haishindwi na kitu. Kwa hivi bustani ya maua itatengenezwa nyuma ya jengo. Maua nipendayo yatapandwa huko. Patakuwa na chumba cha kusomea. Napenda kuandika na mashairi kwa hiyo nitanunua vitabu vyote bora juu ya mambo haya mawili. Zaidi ya hayo vitu vyote vya tunu — idhaa, santuri, simu na motakaa—vitakuwa katika miliki yangu mara moja.

Lakini sitatupa jamaa zangu maskini. Mti huimarisha shina lake kwa kivuli cha matawi yake, hivyo watakuwa na haki ya kwanza katika mali yangu. Nitatoa msaada mara kwa mara kwa jamaa nionao wana dhiki kubwa. Nitajaribu niwezavyo kuwapatia kazi wasio kazi. Wale, wapendao kufanya shughuli zao wenyewe, lakini hawawezi kuzifanya kwa kukosa fedha, watapewa karadha waendeshe kazi zao. Kisha nitaanza safari ya kutalii dunia.

Baada ya kujizatiti na maarifa ya kutalii dunia, nitaanza kazi yangu katika nchi yangu. Nitaanzisha ukulima wa namna kubwa na bora kwa kutumia zana za siku hizi. Faida haitakuwa gharadhi yangu tu. Nimeng’amua ubora wa ukulima katika Afrika Mashariki. Kazi hiyo itatendwa hata kama itagharimu fedha nyingi. Nitatengeneza vyuo mashambani vitavyotiliwa mkazo wa mafunzo ya kazi za ufundi. Fedha ya malipo ya wanafunzi maskini lakini hodari itatengwa. Nasadiki sana kwamba hapana taifa liwezalo kuendelea pasipo maenezi ya elimu ya wanawake. Kwa hivyo nitatoa fedha nyingi kwa ajili ya elimu ya wanawake.

Mashaka ya maskini yameshughulisha vile vile akili yangu kwa wakati mrefu. Kwa kushirikiana na matajiri wengine nitajenga nyumba kando ya kufanyia kazi, huko maskini watapewa kazi.