• 1. Uzuri wa mwaka hufikia upeo

• 2. Miti hupukutika majani

• 3. Maua na manukato yake

• 4. Hatari ya maua

• 5. Matunda na mboga; Tusaidie maumbile

Uzuri wa mwaka hufikia upeo wake wa ajabu wakati huu kwa sababu dunia huwa katika pambo ambalo hapana stadi awezaye kulifanya ila maumbile peke yake. Ardhi iliyoyabisika kwa jua; iliyomomonyoka kwa mvua; na iliyogeuka vumbi kwa kukanyagwa kwa nyayo, kwato na magurudumu; huziba majeraha yake mabaya kwa zulia kubwa la kijani.

Miti iliyopukutika majani kufanya mbolea chini huonyesha matawi yake matupu mbinguni. Utadhani imekufa na imekauka lakini sivyo. Imepumzishwa kuchukua mzigo wa majani mabovu ipate kuchukua tena majani mapya. Wakati huu wa kupumzika matawi yake matupu huomba Mungu kama watu wafanyavyo kwa mikono yao.

Maua mbalimbali huchanua. Kuchanua huku hufanya ardhi ionekane kana kwamba imo katika kicheko kikubwa cha furaha. Hapa maua mekundu au meupe, pale manjano au zari, huku samawati au hudhurungi, huko fua au kijivu. Kila mmea huonyesha fahari yake, na sura ya kuvuta macho huenea pande zote. Hewa hujaa manukato ya asumini, waridi, kilua na mkadi. Uvundo wa jasho hufukuzwa.

Wakati huu huu ndege hutustarehesha kwa sauti zao nzuri. Nyuki hushughulika katika maua kukusanya asali yote wawezayo na kuvuma kwao hutumbuiza sana. Na wadudu wengine huwa katika karamu kubwa. Lakini maua yote si mema. Mengine yana sumu nayo ni hatari kwa viumbe. Imesemekana kweli kuwa kinachopendeza pengine hutapisha.

Matunda mengi hupatikana katika msimu. Matunda yana ladha isiyoghushiwa inayofaa sana kwa afya. Mboga kadhalika hupatikana kwa wingi. Neema hii hutukuza msimu juu ya nyakati nyingine. Walakini, ingawaje matunda ni chakula chema lazima yaliwe kwa hadhari. Nzi hutua juu yake naye huacha viini vya maradhi. Kwa sababu matunda mengi huliwa bila kupikwa viini hivi hudhuru watu.

Hatuwezi kupamba dunia kama msimu ufanyavyo wakati wake, lakini ni hasara iliyoje kutazama pambo hilo lote likipambuka bila kutenda neno lo lote! Jambo hili lasikitisha sana. Ingefaa kufanya bustani ndogo kila tuwezapo. Hii itatukumbusha uzuri wa msimu. “Asaidiaye kuotesha jani humsaidia Mungu.” Tukisaidia kazi yake ya maumbile tutapata baraka.