• 1. Asili ya uoto na uzazi

• 2. Josho la ardhi

• 3. Msaada katika mashamba

• 4. Pingamizi kazini na zohali safarini

• 5. Umeme kwa ajili ya viwanda na taa

Masika ni asili ya uoto na uzazi wa mimea. Ajabu yake ya kuotesha mbegu katika ardhi huleta wazo la ufufuo moyoni. Kwa wazo hili natangaza sifa ya masika. Nikizikwa kaburini leo, sitazamii kufufuka kesho wala mwaka ujao kama mmea, lakini nina tamaa kubwa ya maisha mapya, na kuwa roho yangu haitapotea.

Laiti pasingekuwa na masika ardhi ingekuwa jaa la kutisha na kuchukiza. Kwa sababu ya masika ardhi hujiosha uchafu mwaka kwa mwaka. Josho hili halisafishi takataka tu, lakini hupoza mwunguzo wa jua likarutubisha ardhi vile vile.

Mvua za masika ni msaada bora mashambani. Mashamba ni uti wa mgongo wa maisha yetu; na wakulima hutegemea wakati huu wa mwaka kwa kazi zao. Pasipo mvua bidii zao za kujaza maghala ya vyakula vya dunia zingepotea. Tena si bidii zao tu, hata uwezo wa mito na visima wa kutupatia maji ungeharibika vibaya sana. Kiu ingesonga koo zetu na njaa ingetuangusha chini maiti. Pangekuwa na hatari iliyoje!

Kwa kazi zisizohitaji mvua, masika ni pingamizi kubwa sana. Kila kitu hulowa mzizimo wa hewa ukafanya maisha ya nje magumu. Zohali hutokea katika safari. Chini huwako matope. Mito hufurika ikamong’onyoa udongo na reli ikachimbuliwa. Bahari hujaa msukosuko wa mawimbi. Watu hawachangamki, wanyama na ndege hujikunyata, na mimea huchuruzika maji. Mvua ikichagiza mafuriko hutokea. Hapo mazao na maisha mengi huharibika. Giza huzagaa kwa mawingu ya kijivu yata-ndayo hewani, na radi hunguruma kwa nguvu. Radi hizi hushangilia uzazi wa mimea. Huu ni uzazi mkubwa ustahilio shangwe kubwa. Mama zetu hawashangilii tuzaliwapo?

Yaonekana kama kwamba masika yamekusudiwa kuzuia watu, wanyama na ndege katika makao yao wakati maumbile ya uzazi yafanyapo kazi yake kwa siri makondeni. Mama akitazamia kuzaa hatoki nje. Haruhusu kila mtu kumwona. Hukabili uchungu peke yake kwa tamaa ya mtoto wake.

Masika yana misiba na faraja. Zaidi ya misiba iliyotajwa juu hutokea mateso ya mbu, homa na kuhara. Katika upande wa faida twapata mvua kwa ajili ya mazao yetu, maji ya kunywa na kuoga. Maanguko ya maji kama ya Mto wa Pangani katika Tanganyika ni hazina kubwa sana. Kwa maanguko haya yasaidiwayo na mvua twapata umeme unaofaa sana viwandani na kwa taa mijini. Afrika Mashariki ni nchi ya ukulima. Pasipo mvua kazi hii haifai.