• 1. Marafiki huleta furaha na mahaba katika maisha

• 2. Uchaguzi wa uangalifu wa marafiki

• 3. Huongoza kutengeneza wakati wetu ujao

• 4. Hutusaidia katika furaha na huzuni

• 5. Kudumisha marafiki ni kazi ngumu

• 6. Jaribu la marafiki wema au wabaya

Katika dunia hii ya mateso, jitihadi, machozi na jasho, marafiki ni chemchemi yetu ya faraja na huruma. Watu watanguao urafiki katika dunia ni kama waletao giza duniani. Rafiki ndiye aletaye mahaba na umashuhuri katika maisha. Pangekosekana marafiki dunia ingekuwa ukiwa mtupu.

Yafaa kuangalia sana wakati wa kuchagua marafiki zetu. Hatuwezi kutegemea bahati tukafanya urafiki wa milele njiani, au katika motakaa na gari la moshi. Tusitegemeze kabisa uchaguzi wa marafiki juu ya bahati. Imesemekana kwamba ukitaka rafiki, mjaribu kwanza, nawe usiwe na haraka ya kumsifu; maana mtu mwingine huwa rafiki kwa sababu ya haja yake mwenyewe, wala hatakuwa nawe katika siku ya dhiki yako. Uchaguzi wa marafiki usiongozwe na mawazo ya utajiri. Tusishangazwe na tabia ya nje ya mtu au kwa sifa zake za akili. Urafiki ni jambo la moyo, si la akili. Walakini, ingekumbukwa kwamba mtu mwenye furaha ni yule ajulikanaye na watu wengi, lakini mwenye marafiki wachache tu.

Maongozi ya marafiki zetu yana nguvu kabisa, hushindwa na maongozi ya mama tu, katika kujenga tabia zetu. Marafiki wabaya hudunisha mtu, lakini marafiki wema humtukuza. Mazungumzo, mawazo na mazoea ya rafiki yana mvuto mioyoni mwetu.

Marafiki hupunguza huzuni wakazidisha furaha yetu. Mioyo yetu huwa wazi kwa marafiki zetu na katika haja zetu watusaidia. Rafiki mwaminifu ni tiba katika maisha. Rafiki hutuhifadhi kama ngao. Sifa bora kabisa ya rafiki ni uaminifu.

Kuna watu wasemao kwamba marafiki wema hawapatikani katika dunia hii. Lakini hivi sivyo. Mioyo yetu ina wingi wa choyo cha mapenzi kisichojionyesha katika urafiki. Lakini ingekumbukwa kwamba mapenzi hulipa mapenzi. Ukiwa rafiki mwaminifu ndipo uwezapo kupata rafiki mwaminifu. Rafiki mwema hupatikana upesi, lakini kudumisha urafiki wake ni vigumu. Marafiki wa kweli hushikana kama chanda na pete. Urafiki wa kweli hutokana na kujisabilia na tuzo yake ni mapenzi tu. Heri yetu huvuta marafiki wengi, lakini shari yetu huwajaribu. Marafiki wa kweli ndiyo wavumiliao jaribu la wakati na mabadiliko ya bahati.