• 1. Wakati mbaya kabisa wa mwaka

• 2. Joto lake liunguzalo

• 3. Fadhaa kubwa adhuhuri

• 4. Faraja ya kitambo jioni

• 5. Hutulegeza na hutunyong’ onyeza

• 6. Maradhi na mashaka

• 7. Lakini hufaa kwa kupevusha nafaka na matunda

Moyoni mwangu, naona kiangazi kama wakati mbaya kabisa wa mwaka katika Afrika Mashariki. Afrika Mashariki ina joto la kutosha pasipo kiangazi; kiangazi kikija hucho-chea moto. Huunguza sana. Hapana amani ya moyo wala mwili mchana au usiku kwa joto kali la jua.

Ijapokuwa asubuhi na mapema kuna joto kali hata huwezi kwenda barabarani bila ya mwamvuli au kofia. Ununuzi sokoni lazima uishe mapema iwezekanavyo. Jua likipanda, joto huzidi hata chumba chako huwa kama tanuu, na kwenda kwa miguu mitupu barabarani adhuhuri ni dhiki kubwa kama kwenda juu ya makaa ya moto.

Mabarabara hukimbiwa. Wapitaji wachache wa miguu, wapasao kutoka nje, huchagua upande wa kivuli barabarani, wakijikokota na jasho linamiminika kama maji katika vipaji vyao. Wanyama hujilaza chini vivulini. Ndege hutulia kimya katika viota vyao mitini. Watu huenda kulala. Hata nyumba huonekana zimelala. Kimya cha kutisha huzagaa pote pote.

Lakini kwa bahati njema faraja huja mwisho wa alasiri jua lichwapo. Vumbi barabarani hutulia, pepo za joto huburudika, na watu wengi huenda mabarabarani. Machweo huleta tamasha adhimu ya rangi nzuri mbinguni.

Tena jioni ikiendelea, upepo hupooza usiku kukawa na shwari kubwa hata mara kwa mara hapana baridi ya kutosha kutikisa jani. Watu hugaagaa vitandani, hawawezi kulala. Hutoka kwenda kulala uwani au barazani.

Joto hili ndilo sababu ya ulegevu na uvivu wa watu wa Afrika Mashariki. Limewasaliti hata hawapendi kazi ila kulala na kutaka kutendewa mambo yao. Hatujioni twapenda kutenda neno lolote katika joto hili. Hewa hii yatutesa sana.

Mito hukauka. Visima huwa vitupu. Maradhi mbalimbali kama vile ndui na kipindupindu hutokea. Roho nyingi hunyemelewa na mauti wakati huu.

Lakini baa hili lina nafuu yake. Nichagizapo kuita kiangazi baa, ni tayari kukisifu. Najua kwamba kwa sababu ya kiangazi nafaka hupevuka makondeni na matunda huiva. Najua vile vile kuwa kiangazi hupendeza katika pande za baridi za Afrika Mashariki kama Usambara na pengine.