UKUFA

“Yintoni na le Kufa nakumbanandini,—

Ufakwe yini na kodw’ aph’ ebantwini?

Uzalwa sisono uyihlo yinyoka,

Akukhw’ endalweni,—andikukujoka!”

Iphepha ngalinye eliphumayo ngezi mini liphuma liphethe umphanga womntu ebekungafuneki nganto ukuba afe. Ngoko ndinga ndingaqondisiswa:

Ukufa lo ngubani na?

Engunyana kabani na?

Le nt’ anj’ ukutabalaza,

Yonk’ impil’ eyiphalaza;

Loo magunya unawo na?

Wayenikwe kangako na?

Usesemthethweni na ke?

Masim’ iinyawo kwelo ke.

Wayephi na emyezweni?

Ngomhl’ omkhulu endalweni?

Phendulani bafondini

Inyaniso ime imi;

Amaguny’ anikwa thina

Ngoko yena wayephi na?

Kwathw’ “umhlaba niwoyise.”

Kwatsh’ uThixo onguYise.

Lo mnumzan’ uvele kubi

Wathi thu ngomhla wobubi;

Kuqale kwavel’ inyoka

Yenz’ izwi lokusinyoka;

Sagxothwa buphuthuphuthu,

Kwatsho kwayimbuthumbuthu;

Kwamakrele kwamililo

Kwazigulo kwazililo.

Uvel’ apho k’ umthakathi,

Sel’ ezenza umphakathi;

Wanikwa ke buqwengana,—

Ngabo wazenz’ isinhanha.

Itsh’ imbali sinityele

Vukani kade nilele.

Lo mfo mna ndimmangalele

Ndimlwa naxa sendilele.

Yimo yoo”Vuk’ endleleni”

Ukujika endleleni,—

Ath’ ephathiswe kangaka

Azinik’ uhakahaka,

Ngeenyawo ezinodaka,

Utsho umbus’ ube mdaka.

Bungcole nobukumkani

Bangabant’ abanenkani.

Ngok’ isono masigxothwe,

Sichithwe nasemabhotwe;

Masincethezwe komkhulu.

Ngengqungquthela enkulu;

’Ze sigwetywe sisakaswe

Nenzala yas’ isasazwe;

Sis’ esazala uKufa,

Sisamfukamel’ uKufa.

Ndimem’ imbizo enku-u-lu,

Komncinane nakomkhulu.

Ndiyimem’ ezazeleni,—

Zomnye ngamny’ ezingontsini.

Ngexesh’ asaphanyazayo

Imithamb’ isabethayo.

Lo mf’ uKufa makagxothwe

Le nt’ ayaziwa eBhotwe.”

Wena Mfu. Sigonyela Khakhaza

Kambe loo ndod’ idlul’ apha

Uth’ uKufa ibiziwe

Labhong’ ilizwe lancama.

Hamba bawo ugqibile.

UMnu. P. Ntsiko

Lo mfana ubesandul’ ukubhala esithi mandimthumele imigca ethetha ngo “Khawulezis’ amaxesha.”

Nantso kambe sewunayo

Wayizuza wagqithisa.

Waqalelwa ngumfazana;

Ibe phi na le nkedama?

Hay’ amanzi ukuthamba,

Kanti mhlamnye alilitye;

Hamba kwekw’ omfo kaNtsiko

Uth’ uKufa ubiziwe.

Nawe Mfu. Columbus Ngxwana

Thole lomgquba lakwaNgqika

Kwingcwaba likaLwaganda

Ubupheth’ intlwayelelo,

Inembew’ entle phakathi.

Kwizwe lakwaMamabolo

Obuthunywe kulo wena.

Besijong’ iint’ ezinkulu

Sinamabhong’ amakhulu,

Sikubona ujongole

Uvutha uphum’ iintlantsi.

Qhaph’ uKufa wathi pheza

Naw’ ubiziwe phambili.

Pheza ke Mnywabe omkhulu

Thole lamalinda-ngcwaba!

Kuwe Mfu. Arthur Magabela

Thole lezidwangube zakwaMdange,

ZakwaMdange wenqabaza;

Ubekujongil’ uBhishophu

Ekuthetha x’ ungevayo;

Bhekuza kujub’ indyulo

Thole lekhaka nomkhonkotho.

Nanko k’ uKufa ethetha:

Uthi: “Pheza ubiziwe.”

Mandiyeke bafondini,

Hi nje, J. C. kaFondini

Abantw’ aba baya phi na?

Uth’ uKufa ubasa phi na

Ebathath’ emsebenzini,

Beya kulal’ unanini?