INYANISO

Siphe Nkosi inyaniso,

Sikukhonze ngayo;

Usinike indumiso,

Sikubonge ngayo.

Sokhululwa yinyaniso,

Ebukhobokeni;

Siluchith’ umfamekiso,

Emiphefumlweni.

Iphelile inyaniso

Apha emhlabeni;

Sekuzalis’ inkohliso

Yodwa elizweni.

Kukh’ abathi Nkosi Nkosi!

Bengenanyaniso.

Uyinkosi yemikhosi

Wen’ uyinyaniso.

Kukhw’ abalahlekileyo,

Beshiy’ inyaniso;

Nabalahlekisiweyo

Bamkel’ inkohliso.

Wena Nkos’ unguSomandla,

Qinis’ inyaniso;

Nik’ amaKristu amandla,

Amel’ inyaniso.

Kwezi mini zokuphela,

Mayivuselelwe;

Kwimihla yokugqibela,

Ilangazelelwe.

ITHEMBA

Singenzani n’ emhlabeni,

Sizuzeni n’ elizweni,

Xa singenalo ithemba,

Intsusa yokusebenza?

Singakwenza n’ ukulima,

Sikuyeke ukulila,

Singayifuya n’ imfuyo,

Xa ithemba lingekhoyo!

Singaluthatha n’ uhambo,

Singabondla n’ abantwana,

Sibasusa kuSathana?

Wakufelwa nangowakho

Ife intliziyo yakho;

Ulil’ uzenzakalise—

Nomphefumlo uwufise.

Singaya na eNkosini,

Ehleliyo ebomini?

Inye nje indlela yayo,

Ikukuthemb’ amandl’ ayo?

Yen’ omzimb’ udiniweyo,

Ontliziyo ityhafileyo,

Omoy’ udakumbileyo,

Akanje na ngofileyo?

Makafundiswe ithemba,

Aphakanyiswe lithemba,

Limhambisele phambili,

Limngenise ezulwini.

Le nt’ ithemba iyinzulu,

Kwezomhlaba kwezezulu;

Ongenathemba ufile;—

Siph’ ithemba ze siphile.

UKHOLO

Sihamba ngenkolo, sixel’ amanyange,

Oyis’ iinjubaqa, oyis’ izihange;

Oyis’ ookumkani, oyisa izizwe;

Oyis ihlabathi, oyisa ilizwe.

Sihamba ngenkolo, sidiliz’ iindonga,

Singenazixhobo, singenazintonga,

Sideleke kanye singenaw’ amandla,—

Sithemb’ ikomkhulu, iNkos’ uSomandla.

Sihamba ngenkolo, iyinkoloseko;

Lithemba lezinto ezengqiniseko;

Soyiswa bubukho bezingabonwayo,

Sime sikhaliphe ngokungabuzwayo.

Siyamgxoth’ uMtyholi nezithunywa zakhe;

Samkel’ uMesiya nemikhosi yakhe;

Siboph’ iintliziyo ezaphukileyo,—

Kwanemikhuhlane encamekileyo.

Sihamba ngenkolo, sicim’ imililo.

Zithi neengonyama zivalw’ imilomo,

Kukh’ osemva kwethu onamandla onke—

NguMdali, nguMenzi waz’ izinto zonke.

Sihamba ngenkolo kumaz’ alo mhlaba,

Sincede Somandla qinis’ olo daba!

Zikholwe izizwe zingathandabuzi—

Adunyisw’ uYise, uBaw’ uMhlekazi!

UTHANDO

Uthando, uthando yimfano kaThixo!

UThixo ngokwakh’ uluthando;

Masiluphuthume uthando loThixo,

Singenalo asinto yanto.

Uthando, uthando aluze lutshitshe,

Lukhazimla lubengezela;

Aluze lubune aluze khe lutshe,

Ngamafuth’ okuthamsanqela.

Uthando, uthando lon’ alunamsindo,

Luhleli luzel’ ububele.

Lon’ alucaphuki, lon’ alunanzondo,

Luthi, “yizani ndinamkele.”

Uthando, uthando lukwayinyaniso,

Uthando lon’ alunamona;

Luhamba luchitha izixakaniso,

Lukholwa ziinto zonke lona!

UThixo luthando! UThixo luthando!

Bazalwana masithandane!

Amandla kaThixo oyisa ngothando,

Ngoko thina masithandaze.

Sincede Somandla siphe nath’ uthando,

Siph’ uthando lobuzalwana,

Sibamb’ umtheth’ omtsha wophawu lothando,

Sihlale thina sithandana.